Садыр Жапаров быйыл БУУнун жыйынына катышуу үчүн Нью-Йоркко барат

Өлкө башчы Садыр Жапаров сентябрь айында Бириккен Улуттар Уюмунун Башкы ассамблеясынын 77-сессиясына катышат. Бул тууралуу тышкы иштер министри Жээнбек Кулубаев Улуттук телеканалга берген маегинде билдирди.

“Өзүңүздөр билгендей былтыр президентибиз БУУнун сессиясына видео байланыш аркылуу катышып тоолорду сактоо боюнча демилге көтөрүп, резолюция кабыл алынган. Быйыл жаратылышты коргоо боюнча 5 жылдык программаны сунуштап жатабыз. Аны Бириккен Улуттар Уюмунун Башкы ассамблеясында айтабыз жана 2022-2023-жылдары кабыл алдырганга аракет кылабыз”, - деген Кулубаев.

Ошондой эле Нью-Йоркко боло турган сапардын алкагында башка мамлекеттердин президенттери жана БУУнун баш катчысы Антониу Гутерриш менен сүйлөшүүлөрдү өткөрөрүн кошумчалаган.

Белгилей кетсек, Садыр Жапаров президент катары Улуттар Уюмунун жыйынына алгачкы жолу барат. Былтыр ал БУУнун сессиясына видео байланыш аркылуу катышкан.