Милиция "Азия молл" соода борборундагы эвакуация боюнча маалымат берди

Бишкектеги "Азия молл" соода борборунун жер төлөөсүндөгү унаа жуучу жайда Тойота Камри үлгүсүндөгү унаанын астынан РГД-5 гранатасына окшош металл буюм табылды. Бул тууралуу Ленин РИИБинин маалымат кызматынан билдиришти.

Билдирүүгө таянсак, 11-августта саат 13:56да "Азия Молл" соода жана оюн-зоок борборунун имаратына бомба коюлганы тууралуу жашыруун билдирүү келип түшкөн. Окуя болгон жерге тергөө-ыкчам тобу барган.

Аталган факты Ленин РИИБинин маалыматтар журналына катталып, тергөөгө чейин текшерүү башталды. Табылган буюмдун тиешелүүлүгүн аныктоо үчүн зарыл экспертизалар дайындалды.

Учурда ыкчам-издөө иш-чаралары жүргүзүлүп жатат.

Маалымат үчүн:

11-августта "Азия молл" соода борборунда бомба бар делинип, ичиндеги адамдар эвакуацияланган. Көп өтпөй соода борборуна барган ишкердин унаасынын астынан граната табылганы айтылган.