Ереванда соода борбордогу жарылуудан каза болгондордун саны 15ке жетти (фото)

Армениянын борбору Ереван шаарындагы "Сурмалу" соода борборундагы жарылуунун кесепетинен каза болгондордун саны 15 адамга жетти. Бул тууралуу чет элдик басылмалар жазышты.

Маалыматка ылайык, куткаруучулар урандылардын астынан 8 адамдын, анын ичинен кичинекей баланын да сөөгүн алып чыгышкан. Акыркы маалыматтар боюнча, 18 адам дайынсыз болууда. Андан сырткары 61 адам ар кандай деңгээлдеги жаракаттарды алышкан.

Эскерте кетсек, жарылуу 14-август күнү соода борбордогу пиротехника сакталган кампада болгон. Учурда урандылардын алдынан жарандарды издөө жана куткаруу иштери уланууда.