Эл өкүлү экс-президенттерге берилген артыкчылыктарды кыскартууну сунуштады

Жогорку Кеңештин депутаты Жеңишбек Токторбаев экс-президенттерге берилген бир катар жеңилдиктерди алып салуу демилгесин сунуштап, коомдук талкууга чыгарды.

Мыйзам долбоору мамлекеттин мүлкүн жана бюджет каражатын рационалдуу пайдаланууга багытталган.

Сунушталган мыйзам долбоору төмөндөгүдөй:

• Жаңы шайланган президент кызматына киришкен учурдан тартып бир айдын ичинде экс-президент мамлекеттик резиденцияда жайгашкан кыймылсыз мүлк объекттерин пайдаланууну токтотуп, чыгып кетсин;
• Мамлекет башчы катары ыйгарым укуктарын токтоткон күнү өзүнө жана жубайына, багуусундагы жашы жете элек балдарына акысыз берилген медициналык тейлөө алып салынсын;
• Мамлекеттик дачалардын бирин өмүр бою пайдалануу укугунан ажыратылсын;
• Мамлекетке караштуу телефон, интернет жана байланыштын башка түрлөрүн акысыз колдонуу, почта жана телеграф жөнөтүүлөрүнүн бардык түрлөрүн өкмөттүк разрядда тейлөө беренеси жокко чыгарылсын;
• Жогорку кызмат адамдары коммуналдык кызмат көрсөтүүлөрдүн акысын өз жанынан төлөсүн.

Мыйзам долбоорунун автору экономикалык жактан кубаттуу Түркия, Кореянын кызматтан кеткен мамлекет башчыларына Кыргызстандын экс-президенттериндей артыкчылыктар берилбей турганын белгилеген.

Белгилей кетсек, учурда Роза Отунбаева менен Сооронбай Жээнбеков экс-президент макамына ээ.