Орус-казак чек арасында сабалгандардын арасындагы 6 жашар кыздын абалы белгилүү болду

Орус-казак чек арасында сабалып, унаалары талкаланган Кыргызстандын жарандарынын бири алардын азыркы абалы туурасында SUPER.KG порталына билдирди.

“Эки унаада жалпы 11 кыргызстандык бар болчу. Ден соолугубуз баарыбыздыкы тең жакшы эле. Кол салгандар унаанын айнегин талкалаганда жаныбыздагы 6 жашар кыздын башын бир аз тилип кетиптир. Жалпысынан абалыбыз жакшы. Ал эми үчүнчү унаадагы Казак жараны катуу сабалган экен, ал ооруканага жаткырылды”, - дейт окуянын катышуучусу.

Эске салсак, буга чейин интернет айдыңында орус-казак чек арасындагы “Озинки” өткөрүү бекетине бара жаткан жолдо кыргызстандыктар сабалып, унаалары талкаланды делген видео тараган. Анда жабыркагандардын арасында алты жашар кыз бар экендиги айтылган. Андан соң алардын бири окуянын чоо-жайын айтып берген.