Садыр Жапаров Камчыбек Ташиевге кайсы эмгеги үчүн наам берилгенин түшүндүрдү

Бүгүн, 2-сентябрда президент Садыр Жапаров мамлекеттик сыйлыктарды тапшыруу учурунда УКМК башчысы Камчыбек Ташиевге эмне үчүн "Кыргыз Республикасынын Баатыры" жогорку даражасын ыйгаргандыгын айтты.

"Эгемендүүлүккө ээ болгон мезгилдин соңку жылдарында өлкөбүздө оош-кыйыш бир топ көрүнүштөр, эл биримдигине бүлүк салган окуялар болуп кетти. Кара ниет, чагымчыл адамдар бир тууган эки элдин ортосуна жик салууга аракет кылышты. Ал кайгылуу окуялар менен дагы коштолуп кетти. Бул ачуу чындык. Бул чындыкты жашыра албайбыз.

Мына ошондой өлкө башына каран күн түшүп турганда кара башын канжыгага байлаган, жанын тобокелге салып чыр-чатакты токтотуп, эки элди жайгаштырган эр-азаматтарыбыз болду. Кээ бир өзүн баатыр сезгендер ал жакка бармак түгүл караандары көрүнгөн эмес. Жаңжалды токтотуп, эки элди элдештирүүдө сап башында бүгүнкү УКМК башчысы Камчыбек Кыдыршаевич тургандыгын эч ким тана албайт. Муну мен өз көзүм менен көрүп, ошол окуяларга катышкан адам катары айта алам.

Анын буга чейин эл кызматында болуп, эл уулу аталган иштери дагы татыктуу бааланып жатканын эл дагы туура көрүп жатат. Бүгүнкү күндө өлкөнүн улуттук коопсуздугун чыңдоо, чек араны бекемдөө жана күч органдарын реформалоо боюнча жүргүзүп жаткан аракеттерин көз жаздымда калтырууга болбойт", - деди Жапаров.