Бишкекте эркек кишини 18 миң долларга алдап кеткен 29 жаштагы кыз кармалды

Бишкекте алдамчылыкка шектелип 29 жаштагы кыз кармалды. Бул тууралуу Ленин райондук ички иштер бөлүмүнүн басма сөз кызматынан билдиришти.

Маалымдалгандай, милицияга арыз менен кайрылган жаран эки чала тааныш аялга чара көрүүнү суранган. Анда анын алтындарын сатып беребиз деп алып кетип, кайра кайтарбай койгонун айткан. Ал эми шектүүлөр алтындарды ломбардга коюп, изин жашырган. Келтирилген чыгым 18 миң 525 долларды түзгөн.

Бул факты боюнча кылмыш иши козголуп, ушул жылдын 23-майында издөө жарыяланган. 30-августта 1993-жылы туулган шектүү кармалып, соттун чечими менен үй камагына чыгарылган.

Учурда анын дагы башка кылмыштарга тиешеси бар же жогу иликтенүүдө.