Чолпон-Атада КМШга мүчө мамлекеттердин ички иштер министрлеринин жыйыны өтөт

Эртең, 8-сентябрь күнү Чолпон-Ата шаарында Көз карандысыз мамлекеттердин шериктештигине мүчө өлкөлөрдүн ички иштер министрлеринин кезектеги жыйыны өтөт. Бул тууралуу SUPER.KG порталына Ички иштер министрлигинин басма сөз кызматынан билдиришти.

Маалыматка ылайык, кеңешмеге Кыргызстан, Азербейжан, Армения, Беларусь, Казакстан, Орусия, Тажикстан жана Өзбекстандын министрликтеринин делегациялары катышат. Мындан тышкары КМШ мамлекеттер аймагындагы уюшкан кылмыштуулук жана кылмыштардын коркунучтуу түрлөрү менен күрөшүүнү координациялоо боюнча бюросунун жана КМШнын террорчулукка каршы борборунун өкүлдөрү да келери айтылды.

Жыйында КМШ өлкөлөрүнүн ортосундагы кылмыштуулукка каршы күрөшүү, оор жана өзгөчө оор кылмыштарга каршы күрөшүү боюнча мамлекеттер аралык программалардын аткарылышы жана кылмыштуулукка каршы күрөшүү боюнча биргелешкен чечимдерди кабыл алуу маселелери каралат.