Тышкы иштер министри Елизавета II’нин элесине арналган көңүл айтуу китебине жазуу калтырды

Кыргызстандын тышкы иштер министри Жээнбек Кулубаев Улуу Британиянын ханышасы Елизавета II’нин элесине арналган көңүл айтуу китебине жазуу калтырды. Бул тууралуу Тышкы иштер министрлигинин басма сөз кызматынан билдиришти.

Кабарлангандай, министр Улуу Британиянын Кыргызстандагы элчилигинде болуп, көңүл айтуу китебине жазуу калтыруу менен ханышанын элесин эскерди.

“Улуу даражалуу ханыша Елизавета II’нин дүйнөдөн кайткандыгына байланыштуу чын жүрөктөн көңүл айтам. Ата Мекенге, элге жана анын таламдарына жан аябастык менен кызмат кылуу, Улуу Британиянын жыргалчылыгы үчүн жан аябас күрөшүү – планеталык масштабдагы бул көрүнүктүү инсандын көптөгөн айырмалоочу белгилеринин бири болгон. Ханыша Улуу Британиянын мамлекеттик кызыкчылыктарына берилгендиктин жана өз элине кам көрүүнүн үлгүсү болуп кала берет”, - деп жазылган эскерүүдө.

Улуу Британиянын Кыргызстандагы элчиси Чарльз Гаррет Жээнбек Кулубаевге элчиликке көңүл айтууга келгендиги үчүн ыраазычылык билдирди.

Улуу Британиянын эң узак тактыда отурган ханышасы Елизавета II 96 жашында дүйнөдөн кайтты.