Кадамжайда окуучу кыздын зордукталып өлтүрүлүшү: Төртүнчү шектүү кармалды

Баткен облусунун Кадамжай районунда 9-класстын окуучусун өлтүрүүгө шектелип төртүнчү адам кармалды. Бул тууралуу SUPER.KG порталына Баткен облустук ички иштер башкармалыгынын басма сөз кызматынан билдиришти.

Билдирүүгө ылайык, 2022-жылдын 8-сентябрында жашы жете элек кыздын өлтүрүлүшү боюнча кылмыш ишинин алкагында суракка Кадамжай районунун жашы жете элек жашоочусу чакырылган. Ал мыйзамдуу өкүлүнүн жана социалдык педагогдун катышуусунда суракка алынган. Тергөө амалдарынын жыйынтыгы менен суракка алынган жашы жете элек бала өзгөчө оор кылмыш ишин жасоого шектелип кармалды. Учурда ал убактылуу кармоочу жайда.

Бүгүн, 9-сентябрь күнү Кадамжай райондук сотунун чечими менен кармалган өспүрүмгө карата эки айга камакка алуу бөгөт чарасы тандалды.

4-сентябрь күнү Баткен облусунун Кадамжай районунун Халмион айыл аймагынын Ноогардан айылында саат 15:25 чамасында сел өтүүчү тоннелдин ичинде кыздын жансыз денеси табылган. Окуя болгон жерге кароо жүргүзүү учурунда колу артка жип менен байланган, моюнунан жип менен муунтулуп киши колдуу өлтүрүлгөн кыздын жансыз денеси табылган.

Кыздын сөөгү 5-сентябрда жерге берилген.