Кыргыз-тажик чек арасындагы ок атуу толугу менен токтоду

Кыргыз-тажик чек арасындагы ок атуу толугу менен токтоду. Бул тууралуу президенттин Баткен облусундагы өкүлү Абдикарим Алимбаев билдирди.

“Учурда чек арачылар, милиция кызматкерлери жана УКМКнын облустагы жетекчилери Согди облусунун тиешелүү жетекчилери менен биргеликте иликтөө ишин алып барууда. Облустун калган тилкелеринде кырдаал тынч жана чек арачылардын тыкыр көзөмөлүндө”, - дейт Алимбаев.

Эскерте кетсек, бүгүн эртең менен кайрадан кыргыз-тажик чек арасында ок атылды.

УКМКнын Чек ара кызматы билдиргендей, Кыргызстандын чек ара кызматкерлери Баткендин Булак-Башы тилкесинде кызмат өтөп жаткан учурда Тажикстандын чек арачыларын байкашкан. Алар мурда түзүлгөн келишимдерди бузуп, такталбаган чек ара тилкесинде күжүрмөн позицияларды ээлешкен.

Тажикстандык чек арачылар кыргыз тараптын тилкеден чыгып кетүү боюнча мыйзамдуу талаптарына баш ийбей, ок чыгарган. Жооп катары кыргызстандык чек арачылар дагы ок чыгарган. Ок атышууда тажик тарап миномёт колдоно баштаган.