Ханыша Елизавета II'нин кызы апасынын өмүрүнүн акыркы мүнөттөрүндө жанында болгонун эскерди

Улуу Британиянын ханышасы Елизавета II'нин кызы Анна апасынын өмүрүнүн акыркы мүнөттөрүндө аны менен чогуу болгонуна ыраазы экенин падышалык үй-бүлөнүн Инстаграм баракчасына жазган.

"Кымбаттуу апамдын акыркы 24 саатында жанында болгонума ыраазымын. Апамды акыркы сапарга узатуу мага урмат жана сыймык болду", - деген ал.

Ошондой эле ал падышалык үй-бүлөнүн аза-кайгысын тең бөлүшүп жаткан бардык жарандарга ыраазычылык билдирген.

Белгилей кетсек, ханышанын табыты Вестминстер сарайында падышалык кароолчулардын кайтаруусунда турат. Кароолчулар күнү-түнү нөөмөт менен кайтарышууда.

Улуу Британиянын ханышасы Елизавета II 8-сентябрда 96 жашында каза болгон. Анын сөөгү 13-сентябрда Лондонго алып келинди. Ханышаны акыркы сапарга узатуу зыйнаты 19-сентябрда өтөт.