Тынчтык протоколу. Кыргызстан менен Тажикстандын УКМК башчылары кол койду

Кыргыз-тажик чек арасындагы абалды турукташтыруу максатында тынчтык протоколуна кол коюлду. Бул тууралуу УКМКнын төрагасы Камчыбек Ташиев билдирди.

Кабарлангандай, тиешелүү протоколго эки өлкөнүн Улуттук коопсуздук боюнча мамлекеттик комитетинин башчылары Камчыбек Ташиев жана Саймумин Ятимов кол койгон.

"Комиссия менен биргеликте Тажикстан менен протоколго кол койдук. Протоколдун негизги маңызы эки өлкөнүн ортосундагы кырдаалды турукташтыруу жана тынчтыкты орнотуу. Ошол эле учурда кырдаалды жөнгө салуу боюнча иш алып баруу болуп саналат. Баткен районунун аймагында абал акырындап турукташып баратат. Акыркы жолугушуудан кийин биз жөнгө салуу жана тынчтык орнотуу боюнча бир нече кадамдарды жасадык. Кырдаал турукташат деген ишеним бар. Эртең иш уланат. Балким, эртең кечинде дагы жыйын өткөрөбүз”, - деди Камчыбек Ташиев.

Кыргыз-тажик чек арасында абал туруктуу делгени менен чыңалуу бар экенин атайын кызмат билдирет. Тажикстан Кыргызстандын аймагына куралдуу кол салууну 14-сентябрь күнү баштаган. Тажик тарап эки тараптуу макулдашууларды бир нече жолу бузуп, ок чыгарган. Анын кесепетинен 59 кыргызстандык мерт кетти. Жабыркагандардын саны 183кө жетти. Жүз миңдеген жарандар өз үйүн таштап, коопсуз жайга кетүүгө аргасыз болду.