Нурлан Мотуевди сабаганга шектелген жаран кармалды

Мурдагы саясатчы Нурлан Мотуевди сабаганга шектелип 35 жаштагы жаран кармалды. Бул тууралуу ИИМдин басма сөз кызматынан билдиришти.

Маалыматка ылайык, Бишкек шаарынын Свердлов райондук милициясына Нурлан Мотуев арыз менен кайрылган. Ал өз арызында ушул жылдын 18-сентябрында Москва жана Гоголь көчөлөрүнүн кесилишинде болжол менен саат 12:40 чамасында белгисиз 3 адам ага карата күч колдонуп, уруп сабап, кара түстөгү барсеткасын тартып алганын, ал барсетканын ичинде көк түстөгү Самсунг А31 үлгүсүндөгү уюлдук телефону, 32 миң сом өлчөмүндөгү акча каражаты, паспорту жана арыз ээсинин пенсиялык күбөлүгү болгонун билдирген. Андан кийин кылмыш болгон жерден шектүүлөр изин жашырып качып кеттишкенин маалымдаган.

Аталган факты (Каракчылык) негизинде кылмыш иши козголгон. Ыкчам издөө иш-чаралардын жүрүшүндө кылмышка шектүү катары мурда бир нече жолу соттолгон Жалал-Абад облусунун 1987-жылы туулган Б.И. аттуу тургуну кармалган.

Кармалган жаран Нурлан Мотуевди алты жылдан бери абдан жакшы тааныгандыгы, жашаган жерин билгендиги, аны сабап кетүүгө Нурлан Мотуев өзү себепкер экени, негизги маселе ортодогу келишпестиктен улам өч алуу максатында сабап кеткендиги аныкталды.

Шектүү Бишкек шаарынын убактылуу кармоочу жайына киргизилди. Ал эми айдап жүргөн унаасы Свердлов РИИБдин короосуна токтотулду. Ал эми жанындагы эки шеригин издөө иштери уланууда.