Ичинде эч нерсе калган эмес. Тажикстандын кол салуусунда Максат айылындагы зыянга учураган үйлөр (видео)

Тажикстандын куралдуу кол салуусунан Лейлек районуна караштуу Максат айылындагы үйлөр зыянга учураган. Тургундардын айтымында, айрым үйлөрдө баалуу буюмдардын баарын алып чыгып кетишсе, кээ биринде үйдү талап-тоноп, андан соң өрттөп жиберишкен.

Белгилей өтсөк, былтыр, 2021-жылы апрель айында Тажик тараптын куралдуу кол салуусунда жергиликтүү тургундардын үйлөрү талкаланган. Андан соң Түркиянын колдоосу менен үйлөр жаңы салынган болчу.

Маалымат үчүн: 14-сентябрда кыргыз-тажик чек арасындагы такталбаган аймакка Тажикстандын аскерлери барып жайгаша баштаган жана Кыргызстандын аскерлеринин аларга карата ошол жерден кетүү талабына көнбөй, тажик тарап биринчилерден болуп ок чыгарган, бирок ал күнү ок атышуу сүйлөшүү жолу менен токтогон.

16-сентябрда Тажик Республикасы тынч жаткан Кыргыз Республикасына кол салды. Маалыматка ылайык, тажик тарап буга чейин сүйлөшүлгөн бардык келишимдерди бузуп, саат 06:00 чамасында Кыргызстандын чек арасына аскерин тартып келип, куралдуу күчтөрдү, аскердик оор техникаларды колдонуу менен чек ара постторун жана калк жашаган аймакты аткылаган.

Тажикстан мурда жетишилген бардык макулдашууларды бузуу менен Кыргызстандын чек арасына аскерлерин алдын ала жайгаштырып, куралдуу күчтөрдү, оор аскердик техниканы колдонуу менен чек аранын бардык периметри боюнча Кыргызстандын Баткен жана Лейлек райондорундагы кыргыз-тажик мамлекеттик чек арасында жайгашкан чек ара жана жарандык объектилерге чыккынчылык менен кол салды. Чек ара кызматы Тажикстандын аскер кызматкерлери катары аныкталбаган адамдар куралдуу кагылышууларга активдүү катышып жатканын билдирген.

19-сентябрга карата тажик тараптын куралдуу кол салуусунан курман болгондордун саны 59га жетти. Алардын басымдуу бөлүгү аскер кызматкерлери. Агрессиянын курмандыктарынын арасында жай тургундар жана балдар да бар. Ал эми жаракат алган жарандардын саны 198ге жетти.

Тышкы иштер министрлиги 14-17-сентябрь күндөрү Кыргызстандын эгемендүү аймагында болгон окуяларды Тажикстан тараптан биздин мамлекетке карата алдын ала пландалган куралдуу агрессия актысы катары баалай турганын билдирген.

Эгемен мамлекетке куралдуу кол салуу уюштуруп, анда тынч жаткан элди мыкаачылык менен өлтүрүп, мүлкүн талап, үйлөрүн өрттөгөн Тажикстан эми дүйнө коомчулугуна маалыматты бурмалап Кыргызстанды күнөөлүү көрсөтүү аракетин көрүүдө. Бүтүндөй тажик басылмалары тынч жаткан Кыргыз өлкөсүн каралаган маалымат таратууда.

Кыргызстандын Чек ара кызматы 17-сентябрь түнү Тажикстандын жарандары Богдари калктуу конушундагы өз үйлөрүн өрттөп жаткандыгын кабарлаган. Тажик тараптын мындай аракеттери кийин кыргыз тарапты айыптоо үчүн атайлап жасалган чагым болуп саналарын белгилеген. Ошондой эле Тажикстандын куралдуу кол салуусун токтотууга мажбурлоо үчүн жооп кайтарууга аргасыз болуп жаткандыгын маалымдаган.

Чек ара кызматы 22-сентябрга карата кыргыз-тажик мамлекеттик чек ара тилкесинде кырдаал салыштырмалуу туруктуу экендигин билдирди.