Ысык-Көлдө баңгизат ташууга шектелип 34 жаштагы жаран кармалды

Ички иштер министрлиги Ысык-Көлдө ири өлчөмдөгү баңгизаттарды ташууга шектүү жаран кармалганын билдирди.

Маалыматка таянсак, ИИМдин БМЖКККнын Ысык-Көл жана Нарын облустары боюнча башкармалыгына М.Ш. аттуу жаран Ысык-Көл аймагында баңгизаттарды сатуу менен алектенип жүрөт деген маалымат келип түшкөн.

Аталган факты боюнча Жети-Өгүз РИИБи тарабынан Кылмыш-жазык кодексинин 283-беренеси боюнча кылмыш иши козголгон.

Жети-Өгүз районунун Барскоон айылында кызматкерлер тарабынан атайын тергөө аракеттерин өткөрүү учурунда 1988-жылы туулган М.Ш. аттуу жарандын башкаруусундагы Хонда СРВ автоунаасы токтотулган. Аталган унаада айдоочунун отургучунун алдында ичинде баңгизат каражаты салынган 60 ширеңке кутучасы табылып алынган.

Соттук-химиялык экспертизанын корутундусуна ылайык, алынган зат салмагы 640 граммды түзгөн “гашиш” баңгизат каражаты болгон. Азыркы учурда кармалган адам Каракол шаарынын тергөө изоляторуна киргизилген.