Санкт-Петербургда казакстандык жаранга военкоматка чакыруу келди

Орусиянын Санкт-Петербург шаарындагы аскер комиссариаты Казакстандын 31 жаштагы жаранына мобилизациянын алкагында чакыруу кагазын жиберди. Бул тууралуу Орусиянын жергиликтүү басылмалары жазышты.

Казакстандын жаранына чакыруу 2-октябрда келген. Турак жай-коммуналдык чарбанын кызматкери кагазды аялы менен чогуу жашаган батирге алып келген. Чакыруу баракчасына Александров деген фамилиялуу аскер комиссары кол коюп, мөөр басылган. Кагазда казак жараны 3-октябрь күнү эртең менен аскер комиссариатына келүүсү керек экендиги айтылган.

Казак жараны паспорттогу жарандыгын көрсөткөнүнө карабай чакыруу кагазы берилген. Учурда бул боюнча териштирүү иштери жүрүүдө.

Белгилей кетсек, Орусиянын президенти Владимир Путин 21-сентябрда жарым-жартылай мобилизация жарыялаган.