УКМК: "Бишкекте жасалма акча каражаттарын сатууга аракеттенгендер кармалды"

Бишкекте жасалма акча каражаттарын сатууга аракет кылган адамдар кармалды. Бул тууралуу УКМКнын басма сөз кызматынан кабарлашты.

Маалыматка ылайык, жасалма АКШ долларларын жеткирүү каналы аныкталып, бөгөт коюлду.

"10-октябрда Бишкек шаарында 5 700 доллар өлчөмүндөгү жасалма банкноттордун партиясын сатууга аракет кылган А.С.А. жана С.У.С. аттуу Кыргызстандын жарандары кармалды. Ошол эле учурда бул адамдар криптовалюта (электрондук акча) сатып алууну көздөгөндүгү аныкталган", - деп айтылат маалыматта.

Аталган факты боюнча Кылмыш-жаза кодексинин 233-беренесинин (акчаны жана баалуу кагаздарды жасалмалоо) алкагында кылмыш иши козголгон. Шектүүлөр убактылуу кармоо жайына киргизилгени кошумчаланды.