"Катар-2022": Тунис курама командасы Дүйнө чемпиондугунан четтетилиши мүмкүн. Себеби?

Футбол боюнча Тунис улуттук курама командасы ноябрь айында Катарда баштала турган футбол боюнча Дүйнө чемпиондугунан четтетилиши мүмкүн. Бул тууралуу чет элдик спорттук басылмалар жазып чыгышты.

Маалыматка ылайык, буга мамлекеттин футбол иштерине кийлигишүүсү себеп болушу мүмкүн. Тунистин жаштар жана спорт министри Камел Дегиш буга чейин Тунистин футбол федерациясын таркатышы мүмкүн экенин кыйыткан. Эл аралык футбол федерациясы (ФИФА) анын сөзүн өлкөнүн футбол федерациясынын ишмердүүлүгүнө кийлигишүү деп эсептейт.

Эгерде ФИФА уюму Тунисти Дүйнө чемпиондугунан четтете турган болсо, анын ордуна Италия курама командасы катышат.

Катардагы Дүйнө чемпиондугу ушул жылдын 20-ноябрынан 18-декабрына чейин өтөт. Тунис курама командасы Австралия, Дания жана Франция менен бир тайпада ойнойт.