Садыр Жапаров ТМУ башкы катчысы Кубанычбек Өмүралиевди кабыл алды

Өлкө башчы Садыр Жапаров бүгүн, 12-ноябрда Түрк мамлекеттер уюмунун (ТМУ) башкы катчысы Кубанычбек Өмүралиевди кабыл алды. Бул тууралуу президенттин маалымат кызматынан билдиришти.

Маалыматка ылайык, анда ишмердүүлүктүн артыкчылыктуу багыттары, ошондой эле жакынкы келечекте уюмдун мындан аркы өнүгүүсү боюнча пикир алмашуу болду.

Мамлекет башчысы Кубанычбек Өмүралиевди Түрк мамлекеттер уюмунун башкы катчысы болуп дайындалышы менен куттуктап, ага боордош элдердин ортосундагы кызматташтыкты бекемдөөгө багытталган жооптуу ишинде ийгиликтерди каалады. Ошондой эле түрк тилдүү мамлекеттердин саясий-экономикалык жана маданий-гуманитардык байланыштарын тереңдетүүнүн маанилүүлүгүн баса белгиледи.

Мамлекет башчысына өз кезегинде Кубанычбек Өмүралиев жаңы кызматта алдыдагы иштин пландары жана эң биринчи милдеттери, атап айтканда Түрк мамлекеттер уюмуна катышуучу өлкөлөрдүн башчыларынын Самарканд шаарында өткөн тогузунчу жыйынында кабыл алынган чечимдердин ишке ашырылышы жана ТМУга мүчө-өлкөлөрдүн ортосунда өз ара мамилелерди чыңдоо боюнча чаралар тууралуу маалымат берди.