Катар эквадордук оюнчуларды сатып алды деген билдирүү боюнча үн катты

Футбол боюнча Катар улуттук курама командасынын башкы машыктыруучусу Феликс Санчес Дүйнө чемпиондугунун ачылышында Эквадор утулуп бериши үчүн оюнчуларына акча берген деген кептерге көңүл бурбоого чакырды. Бул тууралуу чет элдик спорттук басылмалар жазышты.

"Биз биргебиз жана күчтүүбүз. Бул сын бизге эч кандай таасир этпейт. Команда же оюнчу менен боло турган эң жакшы нерсе - ушак-айыңдарга жана ызы-чууга көңүл бурбоо", - деген ал.

Буга чейин Эквадор курама командасынын сегиз оюнчусу Катарга каршы оюнда утулуп берүү үчүн акча алганы маалымдалган. Эквадорлуктар беттеште 0:1 эсебинде утулуп бериши үчүн Эквадордун оюнчуларына жалпысынан 7 миллион 400 миң доллар төлөнүп берилгени маалымдалган.

Катар-Эквадор беттеши бүгүн, 20-ноябрда Бишкек убактысы боюнча саат 22:00дө старт алат.