Өзгөндө жаранды коркутуп, акча опузалаган кылмыштуу топтун мүчөсү кармалды

Өзгөндө жаранды коркутуп, акча каражатын опузалап талап кылган кылмыштуу топтун мүчөсү кармалды. Бул тууралуу Ички иштер министрлигинин маалымат кызматынан билдиришти.

Белгилегендей, ушул жылдын 25-ноябрында жергиликтүү милиция бөлүмүнө Өзгөн шаарынын 32 жаштагы Т.М. аттуу тургуну арыз менен кайрылган. Арызында андан опузалап акча талап кылып жаткан жарандарга карата тиешелүү чараларды көрүүнү суранган.

Жабырлануучунун айтымында, 24-ноябрь күнү болжол менен саат 15:00 чамасында Өзгөн шаарынын Гагарин көчөсүндө жайгашкан "Айчүрөк" кинотеатрынын алдында үч бейтааныш жаран келип, ага күч колдонгон. Алар аны Дэу-Нексиа үлгүсүндөгү унаага салып, Өзгөн районунун Шоро-Башат айылынын талаасына алып барышкан.

Жабырлануучудан 50 000 сом опузалап, жанындагы болгон 10 000 сом акчасын тартып алышкан. Андан сырткары бирөөсү өзүн Өзгөн шаарындагы криминалдык топтордун биринин мүчөсү катары тааныштырып, 25-ноябрь күнү 25 000 сом акча таап келүүсүн айткан.

Бул факты Өзгөн РИИБинин Кылмыштардын бирдиктүү реестрине катталып, Кылмыш-жаза кодексинин 208-беренесинин 2-бөлүмүнүн 3-пункту менен кылмыш иши козголгон.

Ыкчам иш-чаралардын жыйынтыгында шектүү 15 000 сом акчаны алган учурда колго түшүрүлгөн.

Тергөө учурунда кармалган жарандын аты-жөнү аныкталып, ал Өзгөн районунун тургуну, мурда оор кылмыш жасап соттолгон, 42 жаштагы А. уулу Т. экендиги такталган.

Жогорудагы кылмыш иши боюнча тиешелүү тергөө амалдары жүргүзүлүүдө.