Жанар Акаев: "Эмил Жамгырчиев ооруп жатканын айткан, азыр кайда экени белгисиз"

Депутат Эмил Жамгырчиев ооруп жаткан, азыр кайда экени белгисиз. Бул тууралуу бүгүн, 1-декабрда "Альянс" фракциясынын лидери Жанар Акаев SUPER.KG порталына билдирди.

"Чынын айтканда байланыша элекмин, азыр каякта экенин билбейм. Буга чейин сыркоолоп жатканын айткан. Бүгүн - эртең пайда болот деп ойлойм. Жамгырчиевди кармалды дегенге болбойт, болгону чек арадан өткөрбөй коюшкан. А эмне себептен өткөрбөй коюшканын учурда сурап, тактап жатабыз", - деди Акаев.

Ошондой эле ал Чыңгыз Айдарбеков Казакстандын аймагында өткөндүктөн улам жаңы сим-карта алгычакты байланыш үзүлүп калгандыгын кошумчалады.

Эскерте кетсек, 26-ноябрда депутаттар Эмил Жамгырчиев менен Чыңгыз Айдарбековдор кыргыз-казак чек арасындагы "Ак-Жол" өткөрмө бекети аркылуу тажияга бара жатканда Жамгырчиевдин өлкөдөн чыгуусуна тыюу салынганы белгилүү болгон. Эмил Жамгырчиев кармалып, кийин кое берилгени белгилүү болгон.

Ал эми Жогорку Кеңештин депутаты Чыңгыз Айдарбеков учурда чет жакта дарыланып жатканын, жакынкы күндөрү Кыргызстанга кайтып келерин фейсбуктагы баракчасына жазды.