Таалатбек Масадыков Евробиримдиктин Ооганстан боюнча атайын өкүлү менен жолукту

Президенттин атайын өкүлү Таалатбек Масадыков Европа Биримдигинин Ооганстан боюнча атайын өкүлү Томас Никлассон жана Евробиримдиктин Кыргызстандагы өкүлчүлүгүнүн элчиси Мэрилин Йосефсон менен жолугушту. Бул тууралуу бүгүн, 5-декабрда президенттин маалымат кызматынан кабарлады.

Маалыматка ылайык, Европа делегациясы менен болгон жолугушууга Тышкы иштер министрлигинин Ооганстан боюнча атайын өкүлү, өзгөчө тапшырмалар боюнча элчи Авазбек Абдуразаков дагы катышты.

Тараптар Ооганстанда болуп жаткан кырдаалды жана ооган элине гуманитардык жардам көрсөтүүнү улантуу максатында өз ара кызматташууну талкуулашты. Ошондой эле аймактык чакырыктар боюнча пикир алышуу менен бирге аймактагы туруктуулукту жана коопсуздукту сактоо үчүн биргелешкен күч-аракеттерди жасоонун маанилүүлүгүн баса белгилешти.

"Таалатбек Масадыков жолугушуунун жыйынтыгын чыгарып жатып, Батыштын жана Ооганстандын ичинде жана бүтүндөй аймакта күндөн-күнгө татаалдашып бараткан кырдаалды жөнгө салуу жолдорун тез арада издөөнүн зарылдыгын белгиледи", - деп айтылат маалыматта.