Кыргыз балбандары АКШда өткөн күрөш боюнча Дүйнө кубогунда коло байгеге ээ болушту

Эркин күрөш боюнча курама команданын мүчөлөрү Эрназар Акматалиев, Арсалан Будажапов жана Тайырбек Жумашбек уулу АКШда өткөн Дүйнө кубогунда коло байгеге ээ болушту. Бул тууралуу бүгүн, 12-декабрда Дене тарбия жана спорт департаментинен билдиришти.

Маалыматка ылайык, мелдеш 10-11-декабрь күндөрү Коралвилл шаарында өткөн.

"Спортчулар дүйнөнүн алдыңкы спортчуларынан турган курама команда менен чыгышты. Алгач курама команда Япониянын балбандарын 9:1 эсебинде жеңди. Экинчи айлампада ирандык балбандар менен күч сынашып, 4:6 эсебинде жеңилишти. Ал эми коло байге үчүн күрөштө Грузиянын курама командасы менен беттеш өткөрүп, 8:2 эсеби менен жеңүүчү болушту", - деп айтылат маалыматта.

Белгилей кетсек, Эрназар Акматалиев 70 килограмм салмакта, Арсалан Будажапов 97 килограмм жана Тайырбек Жумашбек уулу 65 килограмм салмак категорияда күрөштү.