Баткенде жаранды лотерея ойноторун айтып 99 миң сомго алдап кеткен жигит кармалды

Баткен районунда алдамчылыкка шектүү жаран кармалды. Бул тууралуу SUPER.KG порталына Баткен облустук ички иштер башкармалыгынан билдиришти.

Билдирүүгө ылайык, Баткен районунун Жаңы-Жер айыл аймагынын 26 жаштагы тургуну Н.У. 2022-жылдын апрель айында ютубдан лотерея ойноткон жаранга терминалдан 99 миң сом акча которгонун жана бүгүнкү күнгө чейин лотерея ойнотпой, качып жүргөнүн билдирип, арыз менен кайрылган.

Бул арыздын негизинде сотко чейинки өндүрүш иши ачылган.

"Ыкчам иликтөө иштеринин натыйжасында лотерея ойнотом деген жаран Лейлек районунун 23 жаштагы Б.Н. аттуу тургуну экени аныкталган. Ал 21-декабрь күнү кармалып, убактылуу кармоочу жайга киргизилди", - деп билдиришти облустук милициядан.

Учурда тергөө иштери жүрүп жатат.