Баткенде жер семирткичтерди мыйзамсыз ташыгандар кармалды

Баткенде минералдык жер семирткичтерди мыйзамсыз ташыгандар кармалды. Бул тууралуу Улуттук коопсуздук мамлекеттик комитетинин басма сөз кызматынан билдиришти.

Кабарлангандай, 1-январда УКМКнын Баткен облусу боюнча башкармалыгынын кызматкерлери тарабынан контрабандага каршы күрөшүүнүн жүрүшүндө Чек ара кызматы менен биргеликте түнкү убакта Баткен районунун Үч-Дөбө айылынын аймагынан Тажикстандын Согди облусунун Исфара районунун Хожа-Ало чек ара айылына мыйзамсыз түрдө минералдык жер семирткичтерди ташып келүү аракети токтотулду.

Анда Кыргызстандын 1994-жылы туулган К.М. жана 1994-жылы туулган А.У. аттуу жарандары мамлекеттик номери S 9432 S Ауди 100 маркасындагы унааны пайдаланып, Тажикстандын аймагына контрабанда каналын түзүүгө аракет кылышкан. Алар жакынкы чек ара аймагы аркылуу аз сандагы жүктөрдү ташууну көздөшкөн.

Жүргүзүлгөн иштердин жыйынтыгы менен жогоруда көрсөтүлгөн жарандардын мыйзамсыз иш-аракеттери документтештирилди. Автоунаа жана 7 кап селитра көлөмүндөгү жүк сактоочу жайга коюлган.

Бул факты боюнча ыкчам иш-чаралар жүргүзүлүүдө.