Кыргыз-казак чек арасында баңгизат менен кармалгандар 13 жылга кесилди

Кыргыз-казак чек арасынан 11 килограмм баңгизат менен колго түшкөн жарандар 12 жана 13 жылга эркинен ажыратылды. Бул тууралуу бүгүн, 8-февралда УКМКнын маалымат кызматынан кабарлады.

Маалыматка ылайык, Талас облусунун Кара-Буура райондук соту 30-январда төрт айыпталуучуга карата өкүм чыгарган. Алар УКМК кызматкерлери тарабынан өткөн жылдын 3-февралында салмагы 11 килограммдай үч таңгак баңгизатын Аманбаев атындагы чек ара бекетинен мыйзамсыз алып өтүүгө аракет кылган учурда кармалган.

"Кара-Буура районунун тургундары А.М.А., К.К.М., О.А.Ы. жана Ж.Э.Р. Кылмыш-жаза кодексинин 282-беренеси (Сатуу максатында баңгизат каражаттарын, психотроптук заттарды жана алардын окшошторун мыйзамсыз даярдоо) менен айыпталган. Тергөө жана соттук териштирүүлөрдө кылмыш иши боюнча соттолуучулардын күнөөсү толук далилденди", - деп айтылат маалыматта.

Атап айтканда, А.М.А. аттуу жаран 12 жылга кесилип, 1 миллион сом айып салынган. УКМК кызматкерлерине пара катары сунуштаган 2 миллион 745 миң сом жана 2 миң доллары мамлекеттик бюджетке алынганы кошумчаланды. Ал эми К.К.М., О.А.Ы. жана Ж.Э.Р. мүлктөрүн конфискациялоо менен 13 жылга эркинен ажыратылган.