Жер титирөөнүн очогу болгон Түркиянын Кахраманмараш шаарынын абалы (видео)

Түркиядагы жер титирөөдөн жабыркаган Кахраманмараш шаарында куткаруу иштери улантылып жатат. Анда жергиликтүү куткаруу тобу чет өлкөдөн барган куткаруучулар менен бирге иш алып барууда.

Кахраманмарашка Кыргызстандан гуманитардык жардам алып барган Аскарбек Куручбеков абал оор экенин, элге кийим-кече жана акчалай жардам керектигин белгиледи.

"Чындыгында абал оор. Учурда жеринде чет өлкөдөн келген куткаруучулар эл менен бирге иш жүргүзүп жатышат. Азыр элге кийим-кече жана акчалай жардам керек экен. Анткени каражатка өз керектөөлөрүн сатып алганга", - деди ал.

Түркияда 6-февралда катуу жер титирөө катталган. Жер силкинүүнүн очогу Түркиянын түштүк-чыгышындагы Газиантеп шаарынан 26 чакырым алыстыкта, Сирия менен чек арага жакын жерде орун алган. Буга байланыштуу Түркияда 7 күндүк аза күтүү жарыяланган. Учурда куткаруу иштери жүргүзүлүүдө. Кыргызстан жабыр тарткан түрк калкына көмөк берүү үчүн алгач 63 куткаруучусун жөнөттү. Алар Кахраманмараш шаарында кызмат кылууда. Экинчи жолу ӨКМнын 80 куткаруучудан турган тобу жөнөтүлдү. Алар Газиантеп шаарында жардам көрсөтөт.

Мындан тышкары кыргыз бийлиги Түркияда жабыркагандарга жардам берүү максатында депозиттик эсеп ачып, жер-жерлерде гуманитардык жардамдарды топтоо иштерин жүргүзүүдө.