Министрлик Түркиядагы боз үйлөр казактарга таандык деген кептерге жооп берди

Түркиянын Кахраманмараш шаарында жер титирөөдөн жапа чеккендер үчүн тигилген боз үйлөр Кыргыз өлкөсүнө таандык. Бул тууралуу Өзгөчө кырдаалдар министрлиги расмий түрдө билдирүү жарыялады.

“Түркияда тигилген боз үйлөр казак элине таандык деген видеомаалыматтар социалдык тармактарга тарап, интернет колдонуучуларынын кызуу талкуусун жаратууда. Ал тургай бул видео коомчулуктун нааразычылыгын туудуруп жатат.

Мындан улам тактоо иретинде билдирсек, Кыргыз Республикасынын президенти Садыр Жапаровдун демилгеси менен жер титирөөдөн жабыркаган түрк боордошторго боз үйлөр гуманитардык жардам катары 12-13-февралда жөнөтүлгөн", - деп айтылат маалыматта.

Белгилей кетсек, Өзгөчө кырдаалдар министри Бообек Ажикеев 13-февралда Кахраманмараш шаарындагы атайын тилкеге тигилген боз үйлөр шаарчасына барып, кыргыз эли жиберген гуманитардык жардамды өткөрүп берген. Ошондой эле андагы кыргыз куткаруучулары жана вандык кыргыздардан кабар алган.