Баткенде Өзбекстанга мыйзамсыз мал алып өтүүгө аракет кылгандар кармалды

Баткенде чек арадан мыйзамсыз мал ташып бара жаткандар кармалды. Бул тууралуу Чек ара кызматынан билдиришти.

Маалыматка ылайык, 19-февралдан 20-февралга чейинки аралыкта Айдаркен чек ара отряды тарабынан мыйзамсыз мал ташуу боюнча 3 факты токтотулду. Алсак, 19-февраль күнү Баткендин Кадамжай районунун Чоң-Каражантак аймагында чек ара тозоту Кыргыз жарандары 1992-жылы туулган К.А., 1991-жылы туулган Н.Д.нын башкаруусунда эки Hyundai-Porter унаасын токтотушкан. Чек арачылар автоунааларды текшерүү учурунда 7 бука жана 4 баш майда жандыктарды мыйзамсыз ташып баратканы аныкталган.

20-февралда ушул эле райондо чек ара кезмети дагы бир Хюндай-Портер үлгүсүндөгү унааны Кыргыз Республикасынын 1988-жылы туулган А.А. аттуу жараны башкарып бараткан. Анын унаасынан чек арачылар 5 бука табышкан.

Айдоочулар Кыргызстандан Өзбекстанга мыйзамсыз мал алып өтүүгө аракет кылышкан. Тиешелүү документтер аткарылгандан кийин айдоочулар жана малдар компетенттүү органдардын кызматкерлерине өткөрүлүп берилди.