Ош. Шаарда аялдардын зордук-зомбулукка каршы желекчелерди орнотуу акциясы өтүп жатат

Өлкөдөгү зордук-зомбулукка кабылган аялдардын саны желекчелер менен берилди

Жалпы желекчелердин саны 19 300дү түзөт

Желекчелер жайгашкан жерге атайын маалымат тактайчалары да орнотулган

Желекчелирдин басымдуу бөлүгүн кызыл түс, уурдалган кыздар түзөт, алардын саны 9800

Бүгүн, 10-декабрда Ош шаарында "Гендердик зордукка каршы 16 активизм күндөрү 2013" кампаниясынын алкагында "Аялдарга жана кыздарга карата болгон согушту токтотолу: аялдардын укуктары - адамдын укуктары" деген желекчелерди орнотуу иш-чарасы өтүүдө. Аталган иш-чара 10-декабрь - Эл аралык адам укуктары күнүнө карата өткөрүлүп жатат. Уюштуруучулар тарабынан 19 300 желекче даярдалган. Бул желекчелер зордук-зомбулукка дуушар болгон аялдардын санын билдирет. Алардын ичинен 9800 кызыл желекчелер уурдалган кыздардын саны, 2000 ак желекчелер кыздарды уурдоо учурунда сексуалдык зордук-зомбулукка кабылгандар, ал эми 7500 кызгылт көк түстөгү желекчелер үйдөгү зордук-зомбулукка кабылган аялдардын саны болуп саналат. Бул көрсөткүчтөр бир жыл ичиндеги өлкөдөгү аялдардын саны болуп эсептелет. Иш-чара Бишкек феминисттик Скью демилгеси жана БУУнун колдоосу астында өтүп жаткандыгын желекчелерди орнотуу боюнча координатору Айназ Сулайманова билдирди.