Бишкекте нааразылык акциясына чыккан соодагерлер тарап кетишти

Бишкектеги бир катар соода түйүндөрү жана базарларда иштеген соодагерлердин нааразылык акциясы бүттү. Алар мындай маанидеги митинг 6-мартта да улана турганын айтып, тарап кетишти.

Маалым болгондой, алар Салык кызматы киргизген товардык-транспорттук коштомо кагаздын электрондук түрү (ЭТТН), көзөмөл-кассалык аппараттарга (ККМ) нааразычылык билдирип, министрлер кабинетинин төрагасы Акылбек Жапаровдун кызматтан кетишин да талап кылышты. Ишкерлер чекене соода үчүн патент системасын калтырууну талап кылышты.

Ал эми чогулгандарга Салык кызматынын төрагасынын орун басары Ислам Кыдыргычев чыкты. Бирок ага сүйлөөгө уруксат беришкен жок.

Митингчилер президент Садыр Жапаровду жана Жогорку Кеңештин депутаттарын ККМ киргизүү боюнча министрлер кабинетинин токтомдорун жокко чыгарууну, патент системасынан чыгып, алардын үнүн угууну талап кылышты.