Ак-Ордо конушунда үйү түрттүрүлүп, 4 баласы менен көчөдө калган келин окуя боюнча айтып берди

Бишкектин Ак-Ордо конушунда үйү түрттүрүлүп, 4 баласы менен көчөдө калган Марал Шаболотова SUPER.KG порталына окуя боюнча айтып берди.

"Мен бул жерде 4 балам менен 10 жылга жакын убакыттан бери жашайм. Бул жер тилкесин 2012-жылы ишеним кат аркылуу сатып алгам. Ал эми кошунам 2017-жылы аталган жерге мамлекеттик акты чыгартып, кызыл китеп жасатып алган. Ошонун негизинде мени сотко берип, сот анын пайдасына чечим чыгарып берип койгон. Мен жумушта жүрсөм, үйүм бузулуптур. 2 бөлмөлүү ак эмгегибиз менен курган үй эле", - дейт Марал Шаболотова.

Эскерте кетсек, 1-мартта Жогорку Соттун чечимине таянып сот аткаруучулар Марал Шаболотованын үйүн бузган. Ал эми 2018-жылдан бери аны менен жер талашып соттошуп келе жаткан кошунасы Толкун Самудинова жеринин кызыл китеби бар экенин айтып, кошунасы анын жерине үй салып алганын билдирген.