ӨКМ Бишкекте катталган ири өрт боюнча маалымат берди

Бишкектеги Элебесов жана Щербаков көчөлөрүнүн кесилишинде жайгашкан 2 кабаттуу имараттан чыккан өрт саат 19:04тө толугу менен өчүрүлдү. Бул тууралуу Өзгөчө кырдаалдар министрлигинен билдирди.

Маалыматка ылайык, кырсык катталган имараттын 1-кабатында дүкөн, 2-кабатында тигүүчү цех жайгашкан. Жалын имараттын чатырын жана экинчи кабатын каптаган.

Өрттү өчүрүүгө жалпы 3 бөлүм жана Штаб тартылган. Алдын ала маалыматка караганда, жабыркагандар жок.

Болжол менен 200 чарчы метр аянты өрттөнгөнү айтылат. Учурда тилсиз жоонун келип чыгуу себептери такталып жатканы кошумчаланды.