Бишкек ШИИБи: Камчыбек Ташиевдин уулуна карата кылмыш ишин токтотуу каралып жатат

Мурдагы депутат Камчыбек Ташиевдин уулу Темурланга карата кылмыш иши токтошу мүмкүн. Бул тууралуу бүгүн, 10-декабрда журналисттер менен болгон жолугушуусунда Бишкек ШИИББинин башчысынын орун басары Александр Белунскас билдирди. 

Анын айтымында, айыпталуучу материалдык чыгымдарды кайра калыбына келтирген. Мындан улам жабырлануучу Данияр Сапаров доом жок деп арыз жазып берген. 

“Бирок дөңгөлөк урдоо боюнча башка 2 фактыда аталган топтун катыштыгы бар экендиги такталган”,- деди Белунскас. Ошондой эле тергөөнүн жүрүшүндө шаймандар табылган унаа Тимурландын агасы Таймураска тиешелүү экени аныкталганын кошумчалады. 

Эске салсак, 1-декабрда “Унаа-ууру” рейди жүргүзүлүп, анын натыйжасында 18 жаштагы Т.Тимурлан, 17 жаштагы М.Самидин, 18 жаштагы А.Фарух, 17 жаштагы М.Эрнист кармалган. Алар Хонда Аккорд үлгүсүндөгү унаанын дөңгөлөктөрүн уурдап жаткан жеринен кармалышкан. 

Кылмышка шектүүлөрдү кармоо учурунда Ташиев Тимурландын башкаруусундагы Мерседес-Бенц  үлгүсүндөгү автоунаанын ичинен  8 кирпич, дөңгөлөктүн 20 тирөөч болту, 3 балондуу ачкыч жана домкрат табылган. Кармалгандардын арасында Жогорку Кеңештин мурдагы депутаты Камчыбек Ташиевдин уулу, 18 жаштагы Тимурландын бар экени айтылган.