Сокулукта бир тууган эже-инини унаа сүзүп кетти

Чүйдүн Сокулук районунда айдоочу эки баланы сүзүп, окуя болгон жерден качып кеткен. Бул тууралуу SUPER.KG порталына Жол кыймылынынын коопсуздугун камсыздоо боюнча Чүй облустук башкармалыгынан билдиришти.

Жабырлануучулар бир туугандар: эжеси менен иниси экени айтылды.

Маалымдалгандай, окуя ушул жылдын 8-мартында болгон. Анда болжол менен саат 19:51 чамасында Военно-Антоновка айылынын Фрунзе жана Токтогул көчөсүнүн кесилишинде белгисиз айдоочу кара түстөгү унаасы менен жолдо өтүп бара жаткан эки өспүрүмдү сүзүп кеткен. Андан соң окуя болгон жерден изин жашырып кеткен.

Натыйжада 2012-жылы туулган Д.А жана 2017-жылы туулган Д.З аттуу бир туугандар Сокулук аймактык ооруканасынын травматология бөлүмүнө жаткырылган.

Жогоруда аталган кылмышка шектелип 1985-жылы туулган К.А. аттуу жаран кармалды. Ага таандык ВАЗ-21120 үлгүсүндөгү унаа убактылуу кармоочу жайга киргизилди.