Казакстандагы шайлоо: Парламентке өтпөй калгандар шайлоонун жыйынтыгын жокко чыгарууну талап кылышууда

Казакстанда парламентке өтпөй калган талапкерлер шайлоонун жыйынтыгын тааныбай турганын билдиришти. Алар Алматы, Чымкент, Орол жана Караганды шаарларында добуш берүү мыйзам бузуулар менен коштолгонун айтып чыгышты.

Мажилис менен маслихатка өтпөй калган талапкерлер шайлоонун жыйынтыгын жокко чыгарууну талап кылышууда. Алар шайлоону кайрадан өткөрүү керек деп эсептешет.

Көз карандысыз шайлоочулар шайлоо учурунда бюллетендерди жапырт таштоо, протоколдордун жыйынтыгын бурмалоо учурлары катталганын маалымдашты.

Казак бийлиги байкоочулардын назарын бурган мыйзам бузуулардын айрымдарын мойнуна алып, бирок бул добуш берүүнүн жыйынтыгына олуттуу таасирин тийгизбегенин белгиледи.