Баткенде улгайган адамдар уурулукка шектелип кармалды

Баткен облусундагы кампадан буюмдарды уурдоого шектелип үч адам кармалды. Бул тууралуу Баткен облустук ички иштер башкармалыгы билдирди.

Милициянын билдирүүсүнө ылайык, Кызыл-Кыя шаарынын 42 жаштагы тургуну Үч-Коргон айыл аймагындагы товар сактаган кампасынан 13-март күнү жалпысынан 228 миң сомдук буюмдарын белгисиз жарандар уурдап кеткенин билдирген.

Бул факты боюнча кылмыш иши козголгон.

Ыкчам иликтөө иш-чараларынын жүрүшүндө кылмыштын изи сууй электе шектүү катары Ош облусунун Отуз-Адыр айылынын тургуну 54 жаштагы М.А., Ош облусунун Ноокат районунун тургундары 59 жаштагы Д.А. жана 68 жаштагы Ж.Т. аттуу жарандар Үч-Коргон айыл аймагынан кармалды.

Шектүүлөр кармалган учурда жанынан жабырлануучунун уурдалган буюмдары далил зат катары табылган.

Азыркы күндө уурдалган буюмдар өз ээсине кайтарылып берилип, тергөө иштери уланууда.