Казакстанда ооз ачарга барган дарыгерлер массалык түрдө ууланышты

Казакстандын Актау шаарында дарыгерлер массалык түрдө ууланышты. Бул тууралуу казак маалымат каражаттары жазып чыгышты.

Маалыматка ылайык, 10-апрелде Актау шаарындагы ресторандардын биринде ооз ачуу өткөрүлүп, ага райондордун жана шаардын медицина кызматкерлери чакырылган. Ооз ачарга жалпы 50 адам чакырылып, алардын ичинен 16 адам уулануу белгилери менен ооруканага кайрылган.

Мангистау облустук жугуштуу оорулар бөлүмүнүн башчысы Гульбану Нуржанованын айтымында, ооруканага кайрылган бейтаптардын абалы учурда жакшы.

"Ооруканага жалпы 16 адам кайрылып, 10 бейтап ооруканага жаткырылды. Бейтаптардын дене табы көтөрүлүп, кусуп уулануу белгилери менен кайрылышкан. Учурда анализдердин жыйынтыгын күтүп жатабыз. Бейтаптардын өмүрүнө эч кандай коркунуч жок. Ууланган дарыгерлердин көбү ичи ооруганын айтып даттанышууда", - дейт ал.