"Бирөө каза таап, дагы экөө оор абалда". Токтогулда мугалимдер жол кырсыгына кабылды

Жалал-Абад облусунун Токтогул районундагы К.Чокоев атындагы орто мектептин мугалимдери жол кырсыгына учурады. Бул тууралуу бүгүн, 15-апрелде Билим берүү жана илим министрлигинен кабарлашты.

Маалыматка караганда, жол кырсыгынын кесепетинен бир мугалим каза болду. Учурда 2 мугалимдин абалы оор деп бааланууда. Ал эми 3 мугалим хирургия бөлүмүндө дарыланып жатканы кабарланды.

"Мектептин математика мугалими Сүйүнбү Момунбаева алган жаратынан улам каза болду.

Буга байланыштуу министрлик маркумдун жакын туугандарына терең кайгыруу менен көңүл айтып, аза-кайгысын тең бөлүшөт. Ошол эле учурда жабыр тарткандардын батыраак сакайып кетүүсүн тилейт", - деп жазылат маалыматта.

Азырынча Жалал-Абад облустук Жол кыймылынын коопсуздугун камсыздоо башкармалыгы жана Саламаттыкты сактоо министрлигине чалып, жооп ала албадык.