ИИМ жарандарды жалган маалымат таратпоого чакырды

Ички иштер министрлиги социалдык тармактар аркылуу кылмыш жасалгандыгы жөнүндө жалган маалымат тараткандар кылмыш жоопкерчилигине тартыла тургандыгын эскертет.

"Акыркы мезгилде социалдык тармактар аркылуу жарандардын кылмыштар жөнүндө жалган маалымат тараткан учурлары көбөйүүдө. Анын катарында жаш кыздын сабалган видеосу дагы бар. Аталган видео биздин өлкөдө эмес, башка мамлекеттин аймагында тартылган. Жарандарды коомчулукту ызы-чууга салган ар кандай жалган маалыматтарды таратуудан алыс болууга жана расмий маалыматтарга гана ишенүүгө чакырабыз", - дешет министрликтен.

Кылмыш жөнүндө атайылап жалган маалымат жасоо Кыргыз Республикасынын Кылмыш-жаза кодексинин 363-беренесине (Кылмыш жасалгандыгы жөнүндө билип туруп жалган билдирүү жасоо) ылайык кылмыш жоопкерчилигине тартылат.

Ички иштер министрлиги жарандарды социалдык тармактарда жана Интернетте кылмыш жасалгандыгы жөнүндө жалган маалыматтарды таратпоого, мүмкүн болгон фактылар боюнча "102" номери аркылуу ички иштер органдарына билдирүүгө чакырат.