Быйыл 2 миңден ашуун Кыргыз жараны Венгрияда жумушка орношо алат

Будапешт шаарында эмгек рыногу жана иш менен камсыз кылуу боюнча биринчи кыргыз-венгр форуму болуп өттү. Иш-чара 18-апрелде өтүп, ага Кыргызстандан 25тен ашык жеке ишке орноштуруу агенттиктеринин жана Венгриядагы 30 рекрутингдик компаниялардын өкүлдөрү катышты.

Тышкы иштер министрлигинин маалыматына ылайык, форумда Кыргыз жарандарын Венгрияда ишке орноштуруунун шарттары жана тартиби кеңири түшүндүрүлдү.

Ошондой эле кыргызстандык жана венгриялык иш берүүчүлөрдүн ортосунда B2B жолугушуулар уюштурулду.

"Форумдун жыйынтыгында эки өлкөнүн жеке ишке орноштуруу агенттиктеринин ортосунда кызматташуу боюнча 25тен ашык келишимге жана меморандумга кол коюлду. Ушул жылы Венгрияда Кыргыз Республикасынын 2 миңден ашуун жараны жумуш менен камсыз болот деп күтүлүүдө" деп айтылат маалыматта.