"Таштандыларды кабыл алуучу жайда жашайт". Мэрия көчөдө бөтөлкө чогулткан бала боюнча түшүндүрмө берди

Социалдык тармакта Бишкек шаарындагы көчөлөрдүн биринде желим бөтөлкө чогултуп жүргөн баланын видеосу тараган. Бүгүн, 19-апрелде калаа мэриясы баланын жашоосу тууралуу түшүндүрмө берди.

Маалымдалгандай, бала Тыныстанов жана Түгөлбай-Ата көчөлөрүнүн кесилишинде таштандыларды кабыл алуучу жайда жашаары аныкталган. Дарекке барган учурда ал жерде Өзбекстан Республикасынын жарандары жашашкандыгы белгилүү болду.

"Текшерүүнүн жүрүшүндө жашаган жеринде санитардык-гигиеналык нормалар сакталбаганы, балдардын жашоосу үчүн шарттар түзүлбөгөнү аныкталган.

Мындан тышкары, Өзбек жарандарына балдардын мыйзамдуу укуктарын сактоо жана ата-энелик милдеттерди так аткаруу боюнча түшүндүрүү иштери жүргүзүлдү.

Биринчи Май районунун социалдык өнүктүрүү башкармалыгынын кызматкерлери тарабынан чет өлкөлүк үй-бүлөлөргө азык-түлүк жана кийим-кече түрүндө гуманитардык жардам көрсөтүлдү" деп билдиришти мекемеден.

Ошондой эле Бишкек шаарынын мэриясы Өзбекстан Республикасынын консулдугуна маалымат берүү үчүн Тышкы иштер министрлигинин консулдук департаментине кайрылган.