Баткендин чек ара айылында 225 орундуу мектептин курулушу башталды

Баткен районунун Чоң-Талаа айылында 225 орундуу орто мектептин курулушу башталды. Бул тууралуу SUPER.KG порталына президенттин Баткен облусундагы ыйгарым укуктуу өкүлүнүн басма сөз кызматы билдирди.

Маалымдалгандай, мектеп үчүн айыл өкмөтү тарабынан 1,4 гектар жер аянты ажыратылган. Курулуучу мектеп 2 кабаттан турат. Мектепти куруу мөөнөтү ушул жылдын апрель–август айлар аралыгы деп белгиленген. Курулуштун тендердик баасы 83,2 миллион сом.

Эскерте кетсек, өткөн жылы чек арада орун алган куралдуу жаңжалда мектептин 2021-жылы курулуп, пайдаланууга берилген биринчи окуу корпусунун имараты толугу менен талкаланып, калган үч корпусу да зыянга учураган.

Бул мектеп Дүйнөлүк Банктын каржылоосу менен АРИС уюму тарабынан курулуучу, куралдуу жаңжал учурунда жабыркаган облустагы 15 социалдык имараттын катарына кирген.