Бишкекте 1,7 миллион гүл отургузулат

"Бишкек жашыл чарба" муниципалдык ишканасы бир жылдык гүлдөрдү отургуза баштады. Бул тууралуу бүгүн, 24-апрелде борбор калаанын мэриясынан кабарлады.

Ага ылайык, жазгы жоогазындардын ордун жайкы, түстүү петуниялар, сальвиялар, тагетес, алисум жана башка көптөгөн бир жылдык гүлдөрдүн түрлөрү ээлейт.

Учурда гүлдөрдү отургузуу Токтогул көчөсү менен кесилишкен Жаш Гвардия бульвары, Жеңиш аянты, "Дене тарбия" сквери, Пушкин көчөсү боюнча Курманжан Датканын эстелигинин жанында жана "Уркуя"скверинин жанында жүргүзүлүүдө.

Гүлзарлар улуттук оймо-чиймелер, жылдыздар, ошондой эле символикалык даталар түрүндөгү ар түрдүү композициялар менен толтурулууда. Гүлзарлардын эскиздерин Бишкек жашыл чарбанын ландшафттык дизайнерлери түзүүдө.

"Быйыл шаарга бир жылдык 1 миллион 700 миң гүл отургузулат. Кооз гүлдөгөн бир жылдык өсүмдүктөрдүн негизги артыкчылыгы - жайы бою гүлдөп, шаардын көркүн ачат. Шаар тургундарынан гүлдөргө аяр мамиле кылууну, үзбөөнү суранабыз", - деп айтылат билдирүүдө.