Баткенде 40 жылдык тарыхы бар музейдин жаңы имараты курулууда

Баткен районунун Кара-Булак айылында 40 жылдык тарыхы бар музейдин жаңы имаратынын курулушу башталды. Бул тууралуу SUPER.KG порталына президенттин Баткендеги өкүлчүлүгүнөн билдиришти.

Маалымдалгандай, курулушка капсула салуу аземине жергиликтүү бийлик өкүлдөрү, Жогорку Кеңештин депутаттары жана элеттиктер катышты.

Кара-Булак айылында археологдордун изилдөөсүнө ылайык биздин замандын II-IV-кылымдарына таандык “Мыктын Гөрү” көрүстөнү казылган.

Аталган көрүстөндө мумияланган келиндин табыты табылган.

Бул тарыхты сактоо үчүн 1984-жылы “Мектеп музей” түзүлгөн. Ал эми 1992-жылы “Элдик музей” наамы ыйгарылган.

Элдик музейде 2885 экспонаттар бар. Анын ичинен 16 бөлүмү эң байыркы экспонаттар болуп саналат.

Музейдин курулушуна республикалык бюджеттен 21,7 миллион сом каралган.