Жалал-Абадда “Коопсуздук - 2023” машыгуусу жыйынтыкталды

Жалал-Абадда “Коопсуздук - 2023” биргелешкен командалык-штабдык жана мобилизациялык машыгуусу жыйынтыкталды. Бул тууралуу бүгүн, 27-апрелде облустук милициядан билдиришти.

Маалыматка ылайык, Куралдуу күчтөрдүн генералдык штабы тарабынан 25-27-апрель күндөрү Жалал-Абад шаарынын жана Базар-Коргон районунун аймагында “Кыргыз Республикасынын айрым райондорунда өзгөчө абалды киргизүү шарттарында аскердик башкаруу органдарынын жана мамлекеттик бийлик органдарынын иши” темасында “Коопсуздук-2023” биргелешкен командалык-штабдык жана мобилизациялык машыгуу өткөрүлдү.

"Бүгүн өлкөгө куралдуу кылмышкерлер кол салган учурда, массалык башаламандыктар орун алганда күч түзүмдөрүнүн, мамлекеттик органдардын аткара турган жумуштары практика түрүндө көрсөтүлдү.

Практикалык машыгууга куралдуу күчтөрдүн генералдык штабынын башчысы Эрлис Тердикбаев, ички иштер министринин орун басары Октябрь Урмамбетов, президенттин Жалал-Абад облусундагы ыйгарым укуктуу өкүлү Абсаттар Сыргабаев, Жалал-Абад облустук милициясынын жетекчиси Жеӊишбек Абитов катышты", - деп айтылат маалыматта.

Ошондой эле машыгууга активдүү катышкандарга сыйлыктар тапшырылганы кошумчаланды.