"Чымындан пил жасабагыла!". Кылыч Саркарбаев талкууга түшкөн видео боюнча үн катты

Кылычбек Саркарбаев Бажы кызматынын төрагасынын мурдагы орун басары Райымбек Матраимовдун колун өөп жаткандагы видеосуна комментарий берди.

Буга чейин аталган видео социалдык тармактарга тарап, колдонуучулардын талкуусуна жем таштаган. Өз кезегинде Саркарбаев Райымбек Матраимов анын өкүл атасы экенин белгилеп, адамды сыйлоо ар бир инсандын тандоосу экенин айтты.

"Баарыңыздарга салам, мен соцтармактарда тараган видео тууралуу ачык айтып коёюн дедим. Райымбек Матраимов менин өкүл атам. Кичинекей кезимден бери мени чоңойткон, кыйын учурда жардам берген инсан. Мен бул кишини абдан сыйлайм, менден башка дагы көптөгөн адамдарга жардам берген дагы да берип келе жатат.

Өкүл атамдын колун өбүүдөн жаман эч нерсе көрө алган жокмун. Чымындан пил жасоонун кереги жок", - деп билдирди Саркарбаев.