Жалал-Абадда рейд учурунда бир нече уурулук фактыларынын бети ачылды

Жалал-Абад облусунун аймагында 27-29-апрель күндөрү "Мал ууру" аталышындагы ыкчам алдын алуу иш-чарасынын алкагында, бир нече уурулук фактыларынын бети ачылды. Бул тууралуу облустук милициядан билдиришти.

Маалыматка ылайык, Жалал-Абад облусунун Сузак районунун тургуну 1997-жылы туулган С.А. 2023-жылы 22-апрелге караган түнү базар баасы 100 миң сомдук тай уурдап кармалган.

Ал эми Сузак районунун тургуну 2023-жылы 1-апрелге караган түнү базар баасы 42 миң сомдук тайын уурдап кеткендигин билдирген. Аталган кылмыш ишине шектүү катары 1970-жылы туулган С.И. айылдашы аттуу кармалган.

2022-жылдын ноябрь айында Токтогул районундагы жергиликтүү тургундун жайыттагы 50 миң сомдук букасын уурдаганга шектелип ушул эле райондун тургуну 2004-жылы туулган К.М. кармалган.

Ошондой эле 1-апрелде саат 16:00 чамасында автоунаа жуучу жайдын алдынан базар баасы 10 миң сомдук велосипедин уурдаткандыгын айтып дагы бир жаран кайрылган. Бул факты боюнча Сузак районунун тургуну 1979-жылы туулган К.Э. кармалып, убактылуу кармоочу жайга киргизилген.

Тергөөнүн жүрүшүндө шектүү катары кармалган жаран Жалал-Абад шаарынын аймагында бир нече уурулук, тоноо, мал уурулук фактыларына тиешеси бар экендиги аныкталган.

Мындан сырткары рейд учурунда мал союлуучу жана эт сатуучу жайлар текшерилип, эл арасында түшүндүрүү иштери жүргүзүлдү.